A Gschichtla

     
     
< zurück blättern nichts mehr lesen weiter blättern >
       
  ... einsam wacht  

.

An Weihnachtn foahrn mir immer a weng fort. Jeds Joahr. Dou freiermersi scho es ganze Joahr draff. Irchndwos braucht mer doch, wou mer si draff freier konn, wemmer es ganze Joahr ärbert. Am Heiling Abnd gäihts lous. Ährer kummer mer net fort.

Vurm Stau färchtn mir uns net. Ganz im Geengteil. Dou sin die andern Autofoahrer su freindli wäi sunst nie. Dou läßt si doch kanner sei Weihnachtsstimmung verderm. Und mer waß doch, wos aff an zoukummt. Dou kommersi doch draff eirichtn.

Dou packt der aa seine Lebkoung aus, der ander bringt a Thermosflaschn mit an Glühwein derher und vurigs Joahr hot sugoar anner a richtigs künstligs Christbaimla ghabt mit elektrische Kerzn draff. Däi hotter an seiner Autobattrie oogschlossn. Und "Stille Nacht" hot fast a jeder aff anner Kassettn derbei. Dou hommer oft scho die schönstn Weihnachtsfeiern ghabt, mittn aff der Autobahn.

Des is doch wos ganz anderschds, wäi wennsd allans derham vur deiner Kerzn hockst. Wäi mei Mutter zum Beispill. Wäi oft hobbi gsacht zu erer, sie soll halt nu es Autofoahrn lerner, wäi mei Vatter gschtorm woar. Nou könnerts aa a weng wouhie foahrn, nou kummerts aa a weng unter die Leit. Obber dou konnst nix machn. Däi läßt si vo mir einfach nix soong.